Кондолиза Райс: М.Каддафи надад зориулан “Цагаан ордны хар сарнай” гэдэг дуу хийлгэсэн байсан

Ерөнхийлөгч Ж.Бушийн засаглалын үед АНУ-ын Төрийн нарийн бичгийн даргаар ажиллаж байсан Кондолиза Райс Цагаан ордонд амьдрал хэрхэн өрнөж байсныг сонирхуулахаар “The Piers Morgan Tonight” нэвтрүүлэгт оролцжээ.  Тэрбээр “Вашингтон дахь он жилүүдийн дурсамж” нэртэй номоо хэвлүүлээд буй. 

-Нэвтрүүлэгт маань дахин оролцож байгаад тун баяртай байна. Биднийг уулзаж байснаас хойш их олон зүйл өөрчлөгджээ. Энэ хугацаанд Арабын хавар бослого дэгдэж, Бин Ладен, Каддафи нар алагдаж, Мубаракийг түлхэн унагасан байна.  
-Тийм шүү.
-Америкчуудын хувьд ч байдал их өөрчлөгдсөн. Дахин эдийн засгийн хямралд өртлөө. Миний бодлоор манай түүхэн дэх хамгийн аймшигтай хямрал байх. Мөн пицца худалдагчийг Ерөнхийлөгчийн сонгуульд өрсөлдүүлэх гэж байна. 
-Үнэхээр тийм байна шүү. Биднийг уулзсанаас хойш хэдхэн сар өнгөрсөн атал их зүйл өрнөсөн байна.
-Хермейн Кейнийг та хэрхэн дүгнэж байгаа вэ. Тэр Бүгд найрамдах намын нэр хүндийг өсгөж, эсвэл бүр шаварт хутгаж ч мэднэ. Сонгуулийн үеэр юу болохыг урьдчилан хэлэх аргагүй шүү дээ. Гэхдээ та түүнийг хэр сайн хүн гэж бодож байна вэ?
-Би үнэндээ түүнийг сайн мэдэхгүй ч сунгаа дөнгөж эхэлж байна шүү дээ. Миний бодлоор тэр тун сонирхолтой хүн. Гэр бүлийнхнийх нь замнал, өөрийнх нь өнөөдрийн өндөрлөгт хүрсэн зам нь ч анхаарал татахгүй байхын аргагүй. Бизнесийн арвин туршлагатай, эрсдэлтэй замаар өгсөж, уруудаж явахын зовлон жаргалыг тэр сайн мэддэг. Гэхдээ энэ муу зүйл биш. Харин ч бүр эсрэгээрээ байж ч мэднэ. Энэ л шалтгаанаар Бүгд найрамдах намынхан түүнийг сонгосон.
-Цагаан ордонд байх хугацаандаа хэн ч таныг хар арьст эмэгтэй, хар арьст америк гэж ялгаварлахааргүй болтол ажиллаж чадсан гэдгээ та номоороо дамжуулан илэрхийлсэн юм шиг санагдсан. Гэхдээ Хермейн Кейнийг арьсных нь өнгөнөөс болоод дэмжиж байгаа хүн олон байх шиг. 
-Хожлын мод өрсөлдөгчийн маань гарт байгаа үед би тоглоомыг үргэлжлүүлэх дургүй. Бас Ерөнхийлөгч Обамаг зөвхөн хар арьстан гэсэн шалтгаанаар хийсэн үйлдлийг нь шүүмжлэхэд дургүй. Би өөрийгөө хар арьст Бүгд найрамдах намын гишүүн гэдгээ мэднэ. “Хэний ч өмнө хар арьст байх ямар байдгийг тоочих шаардлагагүй” гэдэг үгийг би хэлэх дуртай. Би хэзээ ч цагаан арьстай болохгүй. Түүнээс минь болоод улс төрийн үзлийг минь хүлээн зөвшөөрөхгүй байвал дэндүү ядмаг сэтгэж байна гэсэн үг.
-Номын тань тухай ярилцъя л даа. Шинэ мянган эхлэх үеийн найман жилийн амьдралаа өгүүлсэн номоо бичиж дуусгамагц сэтгэл тань хэр их хөдөлсөн бэ? 
-Их хүч хөдөлмөр зарцуулсан зүйлээ хийж дуусгасны дараа сэтгэл амардаг юм билээ. Гэхдээ…
-Их зузаан ном болсон байна билээ. 
-Тийм ээ. Гэхдээ ном маань ердөө 740 хуудастай. Тэгэхээр нэг жилийн амьдрал 100 хүрэхгүй хуудсанд багтсан гэсэн үг. Цагаан ордон дахь амьдрал, Нэгдсэн улсын төлөө хүмүүс хэрхэн хөдөлмөрлөж, нэг шийдвэр гаргах гэж л ямар их хичээл зүтгэл гаргадгийг тайлбарлахад энэ тоо багадна.
Тэнд ажиллаж байгаа бүх хүн жирийн хүмүүсийн л адил амьдралтай, сэтгэл зүрхтэй хүмүүс. Тэдэнд эргэлзэх зүйл олон. Гэхдээ хамгийн чухал нь тэд нэр хүндийн төлөө биш, эх орныхоо тусын тулд цаг наргүй ажиллаж байсан явдал. Тиймээс би үүнийг нь “Нэр хүндгүй алба” гэдэг юм.  Найман жилийн хугацаанд Цагаан ордонд ажиллаж байхдаа би үүнийг мах цусандаа шингэтэл сайн ойлгосон.
-Та Ерөнхийлөгч Бушийг биширч, Дик Чейниг үзэн ядаж, Дональд Рамсфелдийг үл тэсвэрлэж, Колин Пауэллийн төлөө харамсаж явдаг уу. Номыг тань уншиж байхдаа ийм дүгнэлт хийсэн. 
-Эхнээс нь ярилцъя л даа. Би үнэхээр Ерөнхийлөгчийг биширдэг. Энэ тухайд бол эргэлзэх хэрэггүй.  Түүнийг тун хүнд нөхцөл байдалд гайхалтай сайн ажилласан гэж бодож явдаг цөөнгүй хүний нэг нь би. Харин дэд ерөнхийлөгчийг би хүндэтгэдэг. Бид олон зүйл дээр санал зөрдөг байсан. Ялангуяа хоёдугаар дөрвөн жилд хэд хэдэн удаа ширүүхэн тулаад авсан. Түүний гадаад бодлогод хэрхэн хандаж байгаа нь надад огт таалагдаагүй. Учир нь гадаад бодлогын асуудал надад ч, манай улсад ч тэр хамаатай. Гэхдээ санал зөрлөө гээд би түүнийг үзэн ядаагүй. Хүмүүс хүлээн зөвшөөрөхгүй ч, миний түүнийг хүндэтгэх байдал үзэл бодлын зөрчилдөөнөөс болж үгүй болоогүй.
Доны хувьд бол бид их удаан хугацаанд нөхөрлөсөн. Тиймээс би түүний цочмог зантай гэдгийг хэнээс ч илүү мэднэ. Тэр ажлаа сайн гүйцэтгэсэн. Иргэд Иракийн дайны шийдвэрийг хүлээн зөвшөөрдөггүй. Тиймээс түүнийг буруутгадаг байх. Миний бодлоор Колин Пауэлл ч бас ажлаа тун сайн гүйцэтгэсэн. Бид хоёр сайн найз. Түүний эх оронч хүн гэдгийг би сайн мэднэ.
-Ливийн удирдагч М.Каддафи танд анхаарал хандуулдаг тухай та номондоо бичсэн байсан. 
-Тийм ээ.
-Та түүнтэй уулзсан тухайгаа номондоо бичсэн байна. Би түүнийг үзэгчдэд уншиж өгье л дөө. “Оройн хоолны дараа Каддафи миний тухай бичлэг хийснээ хэллээ. Чухам ямар бичлэг юм бол хэмээн бодож байх зуур тэр хэдийнэ бичлэгээ тавьсан байв. Харин тэр нь ердөө л миний зурагнуудын эвлүүлэг байсан юм.  Бас надад зориулан “Цагаан ордны хар сарнай” гэх дуу захиалан хийлгэж түүнийгээ бичлэгтээ хавсаргасан байсан.  Хачирхалтай санагдаж байсан ч түүнд ямар нэгэн далд санаа байгаагүй”. Хачирхалтай юм шүү. 
-Тийм ээ, тун хачирхалтай бас аймшигтай. М.Каддафи надад анхаарал хандуулдаг талаар би ажилтнуудаасаа болон хэд хэдэн гадаад хэргийн хэргийг сайд нараас сонсож байсан л даа. Гэсэн ч би Ливид ажилтай байсан тул явахаас өөр аргагүй болсон. Хохирогчдод нөхөн төлбөр өгч, зэвсгээ хураалгах талаар дипломат хэлэлцээр хийхээр бид очсон юм.
Гэхдээ түүнийг дүрс бичлэг хийсэн талаар ярихад нь би их айсан. Тэр үед амьд мэнд эргэн ирсэндээ би их баярладаг.
-Түүнээс хойш Каддафи өөр ямар нэг хачирхалтай үйлдэл хийсэн үү? 
-Үгүй дээ.
-Түүнийг алуулсан талаар мэдээлэхэд танд юу бодогдож байв? 
-Хувьсгал гэдэг угаас төгс төгөлдөр сайхан зүйл биш. Олон жил ард түмнээ дарангуйлсан удирдагчид эрх мэдлээ зүгээр л тавиад өгчихдөггүй. Тиймээс тэнд хүчирхийлэл их бага хэмжээгээр заавал байдаг.
-Дундад Азид сүүлийн жилүүдэд цөөнгүй өөрчлөлт, хувьсгал гарч байна. Залуус өөрсдийн хувь заяаг дарангуйлагчдад даатгахыг хүсэхээ больж. Гэсэн ч Ирак руу дайран орсон Америкийн цэргүүд энэ удаа Ливийн удирдагчийн асуудалд оролцсонгүй. Магадгүй энд мөнгөний асуудал ч байгаа байх. Адилхан дарангуйлагчдыг хоёр өөр аргаар зайлуулсан талаар би яриад байна л даа. Ирак руу түрэмгийлсэндээ гэмшсэн учраас Барак Обама Каддафиг иргэдэд нь даатгачихсан юм болов уу?
-Үнэндээ бол адилхан хоёр дарангуйлагчийг унагасан мэт боловч огт өөр нөхцөл байдал, огт өөр цаг хугацаанд болсон үйл явдлууд байгаа юм. Саддам Хуссейн биднийг заналхийлж байсан учраас Иракийн дотоод хэрэгт бид оролцсон. Тэгээд ч Дундад Азид гарч буй зэвсэгт мөргөлдөөний гол буруутан нь Садам Хуссейн байсан. Тэр хэзээ ч эх орноо ардчилсан нийгэмтэй болохыг хүлээн зөвшөөрөхгүй байсан. Персийн булангийн дайны үеэр хэдэн мянган хүнийг хөнөөснөөрөө л М.Каддафи харгис удирдагч болон хувирсан. Гэхдээ тэр Саддам Хуссейн шиг цаг үргэлж бодлогоор хүмүүсийг устгаж байгаагүй.
-Таныг нэвтрүүлэгт оролцох тухай зарласны дараа манай нэвтрүүлгийн цахим хаягаар их олон захидал ирсэн. Тэдний дунд таныг Ерөнхийлөгчийн сонгуульд нэр дэвших болов уу гэсэн асуулт цөөнгүй байсан. 
-Сайхан л хэрэг байна, баярлалаа. Гэхдээ би ийм нэр хүндтэй албанд очих болоогүй байна.
-Таны туулсан туршлага багадаж байна гэж үү, эсвэл та өөрөө хүсэхгүй байгаа юм уу? 
-Би улс төрд зүтгэж байгаа хэдий ч улстөрч биш. Би компанит ажлыг илүү сайн гүйцэтгэнэ. Өөр зүйлсийн төлөө би улс төрчийн албанаас татгалзаж байгаа юм.
-Есдүгээр сарын 11-ний явдлаас хойш та амьдралынхаа багагүй хугацааг Бин Ладений хойноос мөшгихөд зориулсан. Түүнийг алагдсан талаар сонсоход ямар санагдсан бэ? 
-Вашингтонд дөнгөж газардаад байтал Бин Ладений үхлийн талаарх мэдээ зурагтаар гарсан. Тодорхой мэдээлэл байгаагүй учир би манай цэргүүд түүнийг барьсан байна гэж ойлгосон. Мэдээж энэ талаар сонсоод баярласан.
-Өндөр албан тушаал хашихын хүн бүр хүсдэг. Та харин цөөнгүй жил Цагаан ордонд ажиллаж, хүмүүсийн хүсдэг тэр байр сууринд очсон. Үүнийгээ үгүйлдэг үү. Эсвэл гэр бүлийнхэндээ, өөртөө илүү их цаг гаргах боломжтой болсондоо баяртай байна уу? 
-Нэр хүндтэй ажил эрхэлнэ гэдэг гайхалтай сайхан байсан. Гэхдээ энэ бүхнийг хийж дуусгасандаа би баяртай байгаа. Найман жил гэдэг урт хугацаа.
Стэнфордын их сургуульд эргэн очиж, профессороор ажиллах болсондоо баяртай байгаа. Учир нь энэ ажилдаа би илүү дуртай. Тиймээс Төрийн нарийн бичгийн албаа огт үгүйлэхгүй байна. Энгийн иргэдийн адил улс төрийн чухал шийдвэрүүдийг сонингоос уншаад “Энэ ч сонирхолгүй юм байна. Өөр зүйл уншъя” гэх нь илүү сайхан санагдаж байна.

Хермейн Кейн: Цагаан ордонд ажиллаж байгаа хүмүүс сэтгэлд минь нийцэхгүй байна

АНУ-ын Ерөнхийлөгчийн сонгуульд нэр дэвшигч Хермейн Кейнийг татварын шинэчлэлийн цоо шинэ санаа дэвшүүлэгч гэдгээс нь өөрөөр төдийлэн мэдэхгүй. Тиймээс ч түүний тухай илүү дэлгэрэнгүй мэдээлэл үзэгчдэдээ хүргэхээр Пирс Морган студидээ урин, ярилцжээ. 

-Хермейн Кейн гэж чухамдаа хэн бэ. Чадварлаг уран илтгэгчийн цаана ямар хүн нуугдаж байна вэ гэсэн асуултын хариу хүмүүсийн сонирхлыг багагүй татах болсон. Та тун сайн илтгэгч.
-“Бурхан чамд ярих чадвар харамгүй хайрлажээ” эмээ минь үргэлж л хэлдэг байлаа.
-Гэхдээ Хермейн Кейн ярьж байгаатайгаа адилхан хүн мөн үү. Кейний мөн чанарыг хүмүүс хэрхэн ойлгоосой гэж хүсэж байна вэ?
-Миний мөн чанарыг нэг үгээр тодорхойлох хэрэг гарвал би итгэл гэж хэлэх байх. Би гэр бүлийнхэндээ, Ерөнхийлөгч нь болохоор нэр дэвшиж байгаа эх орныхоо ирээдүйд итгэдэг нэгэн. Итгэл найдвар гэдэг миний болон амьдралын минь хамгийн чухал зүйл. Би арван настайгаасаа сүмд очдог болсон. Гэхдээ аав ээж минь хүчээр дагуулж явсан юм биш. Тэд харин намайг бурханд итгэдэг болгон төлөвшүүлсэн юм.
Зүгээр л мөрөөдөж, их том зорилго тавьсан болохоороо би эх орныхоо ирээдүйд итгэж байгаа юм биш. Харин тэр сайхан ирээдүйг бүтээхэд миний оролцоо тун чухал, энэ бол миний л хийх ёстой  ажил гэдгийг мэдэрч байна.
-Яг одоо таныг хийх ёстой ажил тань юу вэ? Хүмүүс Ерөнхийлөгчийн албыг хүсмээр ажил биш гэж боддог байхад та энэ албанд яагаад тэгж их дурлаад байгаа юм бэ? 
-Тийм шүү.
-Бүр дэлхий даяараа л тэгж боддог .
-Яг одоо миний хийх ёстой ажил бол өөрчлөлт хийх. Би ийм ажлыг насаараа хийсэн. Гэхдээ улс орныг өөрчлөх хэмжээний ажил хийнэ гэж зүүдэлж ч байсангүй. Зээ охин минь 1999 онд мэндэлсэн юм. Тэр үед л “Бяцхан үрсийг минь ямар ирээдүй угтаж байгаа бол? Зээг минь том болоход эх орон маань улам сайхан болж чадах болов уу” гэж бодогдсон. Хариулж чадахгүй тэр асуултаас болоод л миний улс төр дэх аялал эхэлсэн юм. Өнгөрсөн 12 жилийн хугацанд их олон зүйл болж өнгөрсөн байна. 2004 онд сенатчийн албанд томилогдсон. Сэтгэл хөдөлгөм үе байсан шүү. Харин 2006 онд…
-Сэтгэл хөдөлгөм гэнэ ээ?
-Тийм ээ.
-Гэхдээ энэ чинь зүгээр л ажил хүлээн авч байгаа явдал шүү дээ. Тэгэхээр тэр үед та жинхэнэ улс төрч болж чадаагүй байж. Тийм үү? 
-Тийм тохиолдолд бол…
-Сонгуульд ялсан учраас л баярласаг хэрэг үү?
-Тийм ээ.
-Уралдаанд хоёрдогч байхыг хэн ч хүсдэггүй. 
-Яг үнэн.
-Ямар ч тэмцээн ялагчтай байдаг. 
-Тиймээс л би нэр дэвшиж байгаа юм. Гэхдээ энэ нь бусад нэр дэвшигчдээ үл тоосон гэсэн үг биш. Би тэднийг бүгдийг нь хүндэтгэж байгаа.
-Хэнийг нь илүү их хүндэтгэдэг вэ?
-Захирагч Митт Ромни болон Спикер Гингрич нар.
-Таны хүндэтгэлийг хүлээсэн нэр дэвшигчдийн жагсаалтын сүүлийг хэн мушгив?
-Хоёулаа хамгийн их хүндэтгэл хүлээсэн хүмүүсийн талаар л ярилцъя л даа.
-Үгүй дээ. За Хермейн хэл л дээ. 
-Би Рон Полыг сайн Ерөнхийлөгч болно гэдэгт итгэхгүй байна.
-Яагаад?
-Учир нь түүний дэвшүүлж байгаа санаанууд ихэнхдээ аливаа асуудлын алдааг нь арилган засах биш, зүгээр л асуудалтай хэсгийг тэр чигт нь үгүй хийх аргачлалтай байсан. Эх оронд маань хийж бүтээх, тэр дундаа засаж залруулах зүйл их байна. Уйлж байгаа хүүхдийг уснаас нь гаргачихвал асуудал шийдэгдчихнэ гэдэгт би итгэхгүй байна. Бидэнд хойш тавих,  устгахгүйгээр нүүр тулан шийдэх олон бэрхшээл байна шүү дээ.
-Таны бага насны тухай ярилцъя л даа. “Би ядуу тарчиг гэр бүлд өсөөгүй. Бидний амьдрал бүр түүнээс ч дор байсан” гэж ярьсан байсан. 
-Хэдийгээр аав маань олдсон ажил болгоныг хийдэг байсан ч хангалттай мөнгө олж чаддаггүй байсан. Бидэнд долоо хоногт нэг л удаа хоолны  мөнгө өгч, харин бусад өдөр нь ээж зууш бэлдэж өгдөг байв. Гэхдээ өдрийн хоолонд бид махгүй хавчуургатай талх төдийхнөөр гол зогоодог байлаа. Дүү бид хоёрт өдрийн хоол авч идээрэй гээд өгөх 25 цент ч олдоггүй байсан юм. Долоо хоногт нэг удаа өгсөн мөнгөөр нь хотдог, алим, сүүтэй авч болдог юм.
-Хүн бүр л өөрийгөө ядуу тарчиг амьдралтай гэж ярьдаг. Гэхдээ таны амссан шиг зовлонг өнөөдөр Америкийн олон мянган өрх үзэж байна. 
-Тэр ч үнэн л дээ. Гэхдээ үүнд бүх хүнийг хамруулж болохгүй. Тэдний дунд гэртээ хөлөө жийн суухын оронд гадагшаа гараад л амьдралаа дээшлүүлж чадахаар хүн цөөнгүй бий. Тэвчээргүй тийм хүн олныг нэрлэж чадна шүү, би.
-Америк төдийгүй дэлхийн цөөнгүй орон ийм бэрхшээлтэй нүүр тулаад байх шиг байна. 
-Гэхдээ энэ бүхэн Уол Стритийг буруутгаад байж болохгүй. Обамагийн засаглалийн үед эмх замбараагүй байдал үүссэнээр л байдал ингэж дордчихоод байгаа юм.
-Тэгэхээр та Америкийн банкны системийг өө сэвгүй гэх гээд байна уу?
-Би тэгж хэлээгүй. Тэгж хэлэх ч үгүй. Би банкуудыг өмөөрч, хамгаалах гэсэн юм биш. Уол Стрит болон банкнууд бол бэрхшээлийн ердөө л нэг хэсэг нь. Тэдний арга барил нь цагаа олоогүй зүйл болсон гэж л хэлэх гэсэн юм.
-Яагаад? Энэ тал дээр би Рон Полтой санал нэгдэнэ. Зарим нэг увайгүй банкнаас болоод эд хөрөнгө барьцаалсан зээл нийгмийн дарамт болоод байна. Эдийн засгийн хямралын хохирогч болчихоод байгаа хүмүүст та “Ажилгүй, байргүй, мөнгөгүй болсон чинь таны буруу. Хэрэв таны буруу биш бол Обамагийн буруу” гэж хэлэх юм байна. 
-Үгүй дээ. Манай улсад ажилгүй 14 сая хүн байна. Тэд тэгээд юу хийдгийг та мэдэх үү? Тэд өдөр бүр ажил хайдаг юм. Гэтэл тэдэнд юу ч олдохгүй байна. Гэхдээ тэд хэзээ ч үүндээ Уол Стритийг буруутган, очиж гомдол мэдүүлж, тэдэнтэй тэмцэхгүй. Ажлаа хайсаар л байх болно. Тэдний төлөө би их харамсдаг. Цагаан ордонд ажиллаж байгаа хүмүүс сэтгэлд минь нийцэхгүй байгаагийн учир тэр.
-Аав, ээж хоёр тань их ажилсаг хүмүүс байсан гэсэн. Тэд танаар их бахархаж байгаа байх. Цагаан ордонд ажиллах гэсэн хүсэлд таныг юу хөтөлсөн бэ? 
-Юун түрүүнд миний итгэл. Бурханд итгэх итгэл. Бүр бага байхад маань л энэ үзлийг заасан. Харин тэр нь нас ахих тусам илүү хүчтэй болж байлаа. Хоёрдугаарт, өөртөө итгэх итгэл маань намайг ийм шийдвэр гаргахад нөлөөлсөн. Аав минь нэг дорж гурван жил хийдэг байлаа. Харин ээж гэртээ ажилладаг байсан юм. Тэд минь их ажилсаг. Хэрэв хүн хүссэн зүйлийнхээ төлөө шаргуу хөдөлмөрлөж, бас өөртөө итгэлтэй байвал бүтэхгүй зүйл байдаггүйг тэд минь надад өөрсдийн биеэр үзүүлсэн. Аав минь үсчин, хаалгач, жолоочоор ажилладаг байв. Хожим нь нэг л ажил хийх шаардлагатай болоход жолоочийн ажлыг сонгосон юм. Түүгээрээ ч бахархдаг байсан.
-Тэгээд “Coca Cola” компанийн тээвэрлэлтийн хэлтсийн дарга болсон. Энэ явдал танай гэр бүлийнхний амьдралын өөрчилсөн. 
-Аав минь мэргэжил эзэмшээгүй л дээ. Гэхдээ л тэр бусдын итгэлийг дааж, ажилдаа амжилт гаргасан. Гол нь аав минь өнгөрөхдөө ээжийг асрах хангалттай хөрөнгө үлдээсэн. Ээж минь альцгеймерийн өвчтэй байсан юм.  Аав минь үргэлж л тэтгэвэрт гарсан хойноо ээжтэй хамт хэрхэн амрахаа төлөвлөдөг байж билээ.
-Тэд таныгодоо хэрхэн дүгнэж байгаа бол?
-Ээж минь диваажинд байгаа байх. Аав минь ч бас тэндээс намайг хараад “Энэ чинь миний хүү шүү дээ” гээд дуу алдаж суугаа.

Хайди Клум: Загвар өмсөгч бол мэргэжил гэдгийг ч мэддэггүй байв

“Бүх сайхан зүйлс эхэлсэнтэйгээ адил дуусах ёстой байдаг. Би Викторияг үргэлж хайрлан хүндэтгэж, нууцыг нь чандлан сахих болно. Энд өнгөрүүлсэн цаг хугацаа минь гайхалтай сайхан байсан юм шүү” хэмээн 2010 оны аравдугаар сард “Victoria’s secret”-тэй хийсэн гэрээгээ дуусгахдаа Хайди Клум хэлж байжээ. “Victoria’s secret”-д 13 жил зүтгэсэн тэрбээр өдгөө загвар өмсөгч төдийгүй жүжигчин, хөтлөгч, продюсер, загвар зохион бүтээгч, бизнес эрхлэгч, дуучны ажлыг хослуулж буй. Тиймдээ ч “Форбес” сэтгүүлээс явуулсан судалгаагаар 2010, 2011 онд хамгийн их ашиг орлоготой загвар өмсөгчөөр шалгарч байж. Супермоделоос супер бизнес эрхлэгч болсон түүнийг Пирс Морган нэвтрүүлэгтээ урьжээ. 

-Би танаас хувцасны талаар зөвлөгөө авах гэсэн юм. 
-Тэг л дээ.
-Ярилцлагынхаа үеэр би ямар зангиа зүүвэл зохистой вэ? 
-Та огт зүүхгүй байж болохгүй юм уу? Би үнэндээ зангианд тийм ч дуртай биш л дээ.
-Тийм гэж үү? 
-Тийм ээ. Тэгээд ч та зангиагүй сайхан харагдаж байна. Дээрээс нь нэг товч задгайлчихвал бүр ч зүгээр.
-Та яг ямар Хайди байхыг хүсдэг вэ? 
-Нөхөр маань үргэлж энэ асуултыг тавьдаг. Би аз жаргалтай сайн эхнэр, ээж байхыг л хүсдэг.
-Та бүхнийг өөрийнхөөрөө шийддэг үү? 
-Та дөнгөж сая хэрхэн шийдвэр гаргадгийг минь харлаа шүү дээ. Би удирдагч байх дуртай. Нөхөр маань ч үүнийг байнга хэлдэг.
-Сийл их биерхүү залуу шүү дээ. Тэр ч бас таны шийдвэрийг л дагадаг уу? 
-Хэдийгээр тэр биерхүү ч их зөөлөн, дөлгөөн хүн. Тийм хүнд гэр бүлийн элдэв асуудлыг асуулгүйгээр шийдвэрлэдэг удирдагч эхнэр хэрэгтэй байдаг.
-Сийлтэй учирснаа аз гэж боддог уу? 
-Тэгэлгүй яах вэ.
-Хайди бусдад хайж байсан хүнтэйгээ учраад л хэдэн 100 хүүхэдтэй болж, аз жаргалтай амьдарч байгаа гэж санагддаг.
-Бид дөрвөн хүүхэдтэй л дээ. Гэр тойрон гүйлдэж эхлэхэд нь 100 хүүхэдтэй болчихсон юм шиг санагдах үе ч байдаг шүү. Таны хэлсэнчлэн би яг л хайж, хүсэж мөрөөдөж байсан хүнтэйгээ учирсан. Бид Нью-Йорк хотын нэгэн зочид буудлын үүдний танхимд танилцсан. Би түүндээ анхны харцаар л дурлачихсан. Яг л хоёр соронзон шиг бие биедээ татагдаж билээ.
-Та хоёр зочид буудалд ямар зорилгоор очсон юм бэ? 
-Би найзтайгаа уулзахаар очсон байсан. Тэгээд л үүдний танхимд хууч хөөрөн сууж байсан хэрэг. Харин тэр найзыг минь Сийл сайн таньдагаар барахгүй тун дотно нөхөрлөдөг байсан юм билээ. Биднийг ярилцан сууж байтал нөхөр маань биеийн тамирын танхимаас гарч ирсэн. Жижиг богино өмдтэй байдгаараа хөлөрчихсөн залуу бидэнтэй уулзсан.
-Та түүнийг мэддэг байсан байх нь ээ? 
-Бид түүнээс өмнө уулзаж байгаагүй л дээ. Гэхдээ дууг нь сонсдог мэддэг байсан.
-Харин тэр таныг мэддэг байсан уу? 
-Үгүй ээ.
-Тэгээд дараа нь юу болсон бэ? 
-Би түүнийг бидэнтэй хамт сууж пицца идэхийг хүссэн боловч нөхөр маань шүршүүрт орох хэрэгтэй байна гээд татгалзаж билээ. Гэсэн ч би түүний зүгээр явуулалгүй “Тэгвэл шүршүүрт орчихоод эргээд ир” гэж хэлсэн юм. Тэр ёсоор Сийл буцаад ирсэн.
-Та үнэхээр захирагч юм аа. 
-Тэгээд л бид пицца идэнгээ олон зүйлийн тухай ярилцсан. Эцэст нь утасны дугаараа солилцон…
-Тэр үнэхээр таныг супермодел гэж мэдэхгүй байсан хэрэг үү? 
-Тэр миний юу хийдгийг гадарлахгүй байсан. Түүнээс хойш цөөнгүй удаа уулзаж, хамт оройн хоол идэн, загварын шоу үздэг байв. Нэгэн удаа загварын шоуны дараах хүлээн авалтын үеэр ширээн доогуур бидний гар санамсаргүй мөргөлдчихсөн. Гэхдээ бид юу ч болоогүй юм шиг царайлж, удалгүй ширээн доогуур гар гараа барилцан суусан.
-Та хоёрын хэн нь хэнийхээ анхаарлыг татсан юм бэ? 
-Хоёулаа л бие биедээ татагдсан.
-“Миний хайж явсан залуу энэ мөн” гэж бодогдож байв уу? 
-Дуу алдмаар, яг эрж байсан зүйлээ олчихсон мэт санагдаж байсан.
-Харин түүнээс өмнө олон “мэлхийг” мөрөөдлийн ханхүү байна гэж бодон үнссэн үү? 
-Тийм шүү.
-Супермоделууд ихэвчлэн надад тохирох хүн үгүй гэсэн бодолтой, энэ талаар айдастай явдаг шүү дээ. Та ч бас тэдний нэг байсан уу? 
-Хэдийгээр би захирангуй, бүхнийг өөрийн дураар шийддэг зантай ч супермоделуудын тэр айдсаас хол байсан шүү.
-Гараа атгалцаад л удалгүй гэрлэчихсэн байх нь. Тэр танд хэрхэн гэрлэх санал тавьсан бэ? 
-Би цөөнгүй хүний гэрлэх санал хэрхэн хүлээж авч байсныг нь сонссон. Магадгүй биднийх хамгийн гайхалтай нь байсан болов уу. Сийл уулын орой дээр цасан гэр барьж бэлдсэн байсан юм билээ. Дотор нь ор байрлуулж, ноосон хөнжил, дэр тавин, сарнай, лаагаар чимэглэсэн байлаа. Тэгээд нисдэг тэрэг хөлсөлсөн байсан. Гэтэл би нисэхээс айдаг юм л даа. Нисдэг тэргэнд бол бүр ч дургүй. Сийл үүнийг минь мэддэг атал нисдэг тэрэг хөлсөлсөн учир түүнд чухал шалтгаан байгаа гэдгийг нь би таамагласан. Тэгээд л бид нисдэг тэрэг рүү үсрэн орсон. Хөөрч эхэлмэгц би уйлж билээ. Нисэхээс айж байсан учраас тэр. Уулын орой дээр биднийг буусны дараа тэр минь гитар даран дуу дуулж, өвдөг дээрээ сөхрөн “Надтай гэрлэхийг хүсэж байна уу” гэж асуусан.
-Гайхалтай сайхан түүх байна. 
-Тийм шүү. Тэгээд бид цасан гэрт орсон.
-Тэгээд… 
-Түүнээс есөн сарын дараа Хенри төрсөн.
-Тэгвэл түүнд цасан гэр гэдэг нэр өгөх байж шүү дээ. 
-Сийл Хенри Олюсган Олюмайд Адеола Самуэл бол нөхрийн маань нэр. Надад Хенри гэдэг нэр нь их таалагддаг байсан. Ойр дотнынхон нь ч түүнийг Хенри гэж дууддаг. Тиймээс би хүү төрвөн Хенри гэдэг нэр өгнө гээд шийдчихсэн байсан.
-Бизнес эрхлэгч хоёр хүн нэг гэрт зохицож амьдарна  гэдэг амаргүй шүү дээ. 
-Бид бие биедээ хайртай. Хамтдаа хөгжилтэй байж чаддаг. Бас бие биенээ хүндэлдэг. Заримдаа надад хэцүү байсан ч тэвчиж, нөхрийгөө өөрийн ажлыг хийхийг зөвшөөрдөг. Бид хамтдаа цаг хугацааг элээх тусам олон арван зүйлд суралцдаг.
-Энэ их ажлын хажуугаар та яаж дөрвөн жаахан хүүхэд өсгөдөг юм бэ? 
-Үнэндээ бид нэг л бага насны хүүхэд асарч, өсгөж байсан гэсэн үг шүү дээ. Блингийг том болж, биеэ даах үед Хенри төрсөн. Тэгсэн ч хоолны ширээ маань эзгүйрээд байх шиг санагддаг байлаа. Тэгээд л Жоан төрсөн. Удалгүй бид хөөрхөн охинтой болохыг хүссэн юм. Тиймээс гурван жилийн дараа Лоуг төрүүлсэн.
-Дахиад хүүхэдтэй болох төлөвлөгөө бий юү? 
-Байхгүй ээ. Одоо бол болсон.
-Эелдэг бяцхан охин хэрхэн супермодел болсон юм бол? 
-Та яагаад намайг эелдэг охин байсан гэж бодсон юм бэ?
-“Project Runway” нэвтрүүлгийг чинь үзэж байгаад л тэгж бодох болсон. Та энэ нэвтрүүлгээ ийм их амжилт олно гэж төсөөлж байв уу? 
-Үгүй шүү. Шинэ ажил эхлүүлж байхдаа төсгөлийг нь төлөвлөх хэрэггүй байдаг юм. Бид 15 жил загварын ертөнцөд хамт ажилласан бөгөөд “Project Runway” нэвтрүүлгийг бид шоуны хөшигний цаана үнэндээ ямар олон хүний хөлс урсдагийг харуулах гэж зорьсон. Би энэ салбарт 18 настай байхдаа хөл тавьсан. Загвар зохион бүтээгчдийн өдөр бүр шинэ зүйл хийж байгаа нь миний сэтгэлийг эрхгүй татсан юм.
-Нэвтрүүлэг тань их амжилт олсон шүү. Хүмүүс үзэх дуртай байдаг. 
-Учир нь жинхэнэ авьяасыг манай нэвтрүүлгийг оролцогчдоос харах боломжтой байдаг.
-Жаахан байхаасаа л загвар өмсөгч болохыг мөрөөддөг байв уу? 
-Үгүй шүү. Үнэнийг хэлэхэд загвар өмсөгч бол мэргэжил гэдгийг ч мэддэггүй байлаа. Загвар зохион бүтээгч болохыг хүсдэг байсан. Тиймээс ч сургууль төгсөөд загварын сургуульд элсэн орсон. Тэнд байхдаа нэг тэмцээнд оролцсон юм. Найз охиныхоо хамт зургаа тус тэмцээнд илгээж билээ. Угтаа энэ тэмцээний зорилго нь өөрийн загвар өмсөгчийг хайж байсан юм билээ. Азаар би тэр тэмцээнд түрүүлчихсэн. Яг л сугалаанд хождог шиг. Тэгж л загвар зохион бүтээгчээс загвар өмсөгч рүү урвасан даа.
-Карл Лагерфелд “Хайди бол загвар өмсөгч биш. Тэр дэндүү том биетэй, цээж томтой” гэж хэлдэг байсан гэсэн. 
-Тэр ч үнэн шүү. Би үнэндээ тайзны загвар өмсөгч биш. Хэзээ ч тийм байгаагүй. Томоохон загварын шоунуудад би оролцдоггүй байсан. Хэтэрхий том биетэй, цээж томтой байсан. Надад таарах хувцас ч олддоггүй байв. Бас намхан, хангалттай туранхай биш.
-Намхан, махлаг гэнэ ээ? 
-Тийм ээ. Загварын ертөнцөд бол намхан, таргандаа л орно. Би бас хоолны дэглэм барьж чаддаггүй, хоолонд тун дуртай нэгэн. Тэр хамгийн том бэрхшээл байсан.
-Үнэндээ 0 хэмжээтэй хувцас өмсдөг бүсгүйчүүдийг эрчүүд таашаадаггүй. Гэсэн ч 1990-ээд оны үеэд бол яс арьс болсон бүсгүйчүүд их түгээмэл байсан. 
-Тийм ээ. Сэтгүүлийн нүүрэнд гарах боломж тийм хүүхнүүдэд л олддог байсан.

Уолтер Исааксон: Стив эцсийн мөч хүртлээ хавдрыг ялчихлаа гэж бодсон

Компьютерийг хүн төрөлхтний амьдралд хамгийн их нөлөөлсөн суут бүтээлүүдийн нэг хэмээдэг. Тиймдээ ч техник технологи тэр дундаа компьютерийн ертөнцөд тэрсэлт хийсэн Стив Жобсыг дэлхийг өөрчилсөн “алимны” эзэн хэмээн нэрийдэх болсон. Түүнийг энэ сарын 5-нд нас барснаас хойш ““Apple” компанийг үндэслэгч чухамдаа хэн байв?” гэсэн асуултын хариу олон хүний сонирхлыг татах болсон. Түүний намтрыг хүүрнэсэн “Стив Жобс” ном худалдаанд гарсан даруйдаа л борлуулалтаараа тэргүүлэгчдийн жагсаалтыг тэргүүлэх болсон нь үүний баталгаа. Олон мянган хүний сонирхлыг татсан асуултад хариулахаар “Стив Жобс” номын зохиолч Уолтер Исааксон “The Piers Morgan Tonight” нэвтрүүлэгт зочилжээ. 

(Бичлэг)
-Стив Жобс гэж чухамдаа хэн байв? 
Уолтер Исааксон: Тэр бол эрсдлийг үл хайхрагч, боломжийг алдалгүй ашиглагч, гайхалтай удирдагч, жинхэнэ ухуулагч байсан.
Стив Жобс: Бидний амьдрал богинохон. Энэ богинохон хугацааг бусдын амьдралыг сүйтгэхэд бүү зориулаарай.
-Өнөөдөр би Жобсын тухай, түүний түүхийг үнэнээр өгүүлэх нэгэн хүнтэй ярилцах гэж байна. Магадгүй бидний яриа домог мэт яригдах болсон Жобсын тухай бодлыг тань өөрчлөх байх. Манай нэвтрүүлгийн зочин Уолтер Исааксон. Тэрбээр Аспен институтын гүйцэтгэх захирал, “Steve Jobs” номын зохиогч юм.  
-Нэвтрүүлэгт тань уригдсандаа их баяртай байна.
-Таны ном худалдаанд гарсан даруйдаа л борлуулалтаараа тэргүүлэгчдийг манлайлж, шүүмжлэгчдийн дунд ширүүн маргаан дэгдээгээд амжсан. Америкийн түүхэн дэх хамгийн гайхалтай бизнесмэний намтар учир ийм амжилт үзүүлнэ гэдэгт нь та итгэлтэй байсан уу? 
Би бүтээлийг тань уншсан. Гайхалтай санагдсан шүү. Ялангуяа түүнийг адармаатай ааш, эгдүү хүрэм байдал, зөрүүд, харгис хэрцгий зантай гэж тодорхойлсон чинь их таалагдсан. Хэдийгээр би түүний тухай сайн мэдэхгүй ч яг л тийм хүн байдаг болов уу гэж төсөөлж байлаа. Гэхдээ дээр нь гайхамшигтай авьяаслаг, овсгоотой гэж нэмэхийг хүсэж байна. 
-Бас суут ухаантан.
-Таны бодлоор суут хүн бүр ийм дутагдалтай байдаг уу? 
-Та намайг хэвлэл мэдээллийн салбарт цөөнгүй жил ажилласныг мэднэ. Би Тед Тюрнерийн компанид ажилладаг байлаа. Тэр үед хүн бүр л түүний ямар яхир зантай болохыг гайхаж, өөр өөрсдийнхөөр тодорхойлдог байв. Гэхдээ л түүнийг салбартаа ямар их зүйл бүтээснийг хэн ч үгүйсгэдэггүй. Яг л түүн шиг Стивтэй хамт ажиллаж байсан тэр ч байтугай түүнийг хамгийн их хүндэлж, хайрладаг хүн бүрийн дурсамж яриа “Стив тэгэхэд толгой хяргачих шахаж билээ” гэх өгүүлбэрээр төгсдөг.
Магадгүй эл номыг бичихэд хамгийн их намайг зовоосон зүйл бол энэ сэдэв. Би уншигчдад хилэн бээлийгээр хүмүүсийн толгой илж буй хүн хэзээ ч дэлхийг өөрчилж, анагааж чадахгүй гэдгийг ойлгуулахийг хичээсэн. Этгээд энэ араншингаараа л тэр хүмүүст урам хайрладаг байсан юм.
-Тэр тантай нэлээн олон жилийн өмнө уулзсан гэсэн байх аа? 
-Тийм ээ.
-Та Эйнштейн, Франклин зэрэг суутнуудын намтрыг бичиж байсан. Тиймээс Стивийн хүсэлтэд татгалзсан гэсэн. Мэдээж үе тэнгийн залуухан эр намтраа бичүүлэхээр таныг зорин ирсэн нь таныг гайхашруулсан байх. 
-Тийм шүү, таны зөв. Түүнийг өөрийн намтраа бичүүлэх хүсэлтэй байгаагаа хэлэхэд нь би тэр даруй л “Та чинь миний үеийн л хүн байна шүү дээ. Хорь эсвэл гучин жилийн дараа хоёул энэ асуудлаар дахин ярилцсан нь дээр болов уу” гэж хэлж билээ. Тэгээд ч тухайн үед тэр одоогийнх шиг амжилтад хүрээгүй, алдаж онож байсан цаг. Тиймээс би 2009 онд эхнэр нь надад хандах хүртэл энэ ажлаас татгалзсан. Эцэст нь эхнэр нь түүний хорт хавдар тусаж, үхлийн аюултай болсныг дуулгасан. Тэгээд л би түүнтэй элэг шилжүүлэн суулгах хагалгаанд орсны дараахан дахин уулзсан даа. Мэдээж энэ удаагийн уулзалтын үеэр би түүнтэй хамтран ажиллах хүсэлтэй байгаагаа дуулгасан.
-Та номондоо Жобсыг хавдартай тэмцэх олон эмчилгээг туршсан гэж бичсэн байсан. Хэдий ухаантай ч тэр бидний адил жирийн л хүн. Тиймээс өөрийгөө аврах гэж тэмцэхдээ тийм шийдвэр гаргасан хэрэг үү? 
-Түүнийг өөрийгөө аврахын тулд элдэв эмчилгээ туршсан гэж бодохгүй байна. Мэдээж тэр бидний адил жирийн л хүн. Гэхдээ түүнд хоёр чанар бий. Тэр хэзээ ч гаж зүйслийг хүлээн зөвшөөрдөггүй. Бас үргэлж шинийг сэдэж, санаачилдаг.
Тэр анагаах ухааны сүүлийн үеийн бүхий л ололт амжилтуудыг туршиж, түүнийгээ судлан өөрийнхөө өвчнийг эмчлэхийг хүссэн. Гэхдээ өвчнөөс, үхлээс айхдаа тэгж шийдээгүй гэдэгт нь би эргэлзэхгүй байна. Хүн төрсний эцэст үхэх нь үнэн. Тиймээс тэр үхлээс ер айгаагүй. Харин тун өөдрөг үзэлтэй хүн байсан тул эцсийн мөч хүртлээ хүн төрөлхтнийг зовоож байгаа хорт хавдар гэх аймшигт өвчнийг ялчихлаа гэж бодож байсан болов уу.
-Та түүний хамгийн дурсамжтай мөчүүдийг хуваалцаж чадсан байх. 40 гаруй удаа ярилцлага авсан байсан. Таны номыг уншиж дуусахад хамгийн түрүүнд “Стив Жобс түүнд таалагдсан болов уу” гэх бодол. 
-Таалагдсан.
-Тэр тийм хайр татмаар хүн гэж үү? 
-Тэр итгэл даахуйц бас бусдын хайр хүндэтгэлийг хүлээж чаддаг хүн. Анх түүнтэй уулзахад эмээх сэтгэгдэл төрдөг. Учир нь тэр зоогийн газар, зочид буудал гээд олон нийтийн газар явж байсан ч хамаагүй харилцагчийнхаа тэнэг үйлдэл, яриаг тэр дор нь л шүүмжилж орхидог. Тэгэхдээ бүр “Би тантай санал нийлэхгүй байна” гэхийн оронд “Миний сонсож байсан хамгийн тэнэг, бүтэлгүй санаа байна” хэмээн чангаар хэлэх вий.
-Шүүмжлэл хоёр янз байдаг шүү дээ. Тэгэхээр тэр эелдэг биш, бүдүүлгээр шүүмжилдэг нэгэн байсан байх нь. Тэгээд яаж бусдын хайр хүндэтгэлийг хүлээдэг байсан юм бол? 
-Таны таашаахгүй ааш араншин түүнд цөөнгүй бий л дээ. Гэхдээ түүнтэй удаан ярилцвал тойруулж, бөөрөнхийлөхгүй оновчтой байдлыг илүүд үздэг гэдгийг нь ойлгох болно.
Миний бодллоор хүмүүсийг эелдгээр шүүмжилснээр олон найз нөхөдтэй болохоос өөр ашиг тус өгөхгүй. Ийм удирдагч хэзээ ч авьяастнуудыг олж нээхгүй.
Гэхдээ тэр хатуу ширүүн үгтэй ч болхи бүдүүлэг хүн биш. Урлагийн гайхалтай мэдрэмжтэй. Пикассо, Боб Диланы бишрэгч. Түүнд төгс байх хүчийг урлагийн мэдрэмж нь өгдөг. Бизнесийн хатуу чанд байдлаа урлагийн романтик мэдрэмжээр зөөллөж, өөрийгөө тэнцвэржүүлдэг байсан юм.
-Номын тань нүүрний зургийг тэр өөрөө сонгосон уу? 
-Би шийдвэр гаргасан. Тэр нэг удаа “Би номын чинь ажилд ер оролцохгүй. Унших ч үгүй” гэж хэлсэн юм. Хэвлэлийн компанийн ажилтан каталогоос энэ зургийг сонгосон юм.
-Надад их таалагдсан шүү. Яг л Стивийн бүтээлүүдийн нэг шиг санагдсан. 
-“Apple”-ийн бүтээгдэхүүн шиг.
-Энгийн, цэвэрхэн атлаа гайхалтай сайхан. Таны номноос Стивийг өргөмөл бас төрсөн эцэг эхээ хайдаг байсан гэдгийг олж уншсан. Энэ талаар яриач. 
-Тэр намайг хөршүүдтэйгээ танилцуулахаар бага насаа өнгөрүүлсэн байшиндаа аваачиж билээ. Тэр үед энэ талаар дурссан. Түүний зургаа, долоо орчим настай байхад хөршүүдийнх нь нэг болох Лиза Макмуюллер өргөмөл гэдгийг нь хэлсэн гэдэг. Тэр үгийг сонсмогцоо л тэр байшин руугаа буцаад гүйсэн гэсэн. Гэртээ ирээд аав, ээж хоёрыгоо хараад өөрийн эрхгүй уйлсан байна. Тэднээс “Намайг өргөж авсан юм уу?” хэмээн асуухад нь Пол Клара нар “Үгүй дээ. Бид чамайг олон арван хүүхдүүдээс сонгож авсан юм. Чи бол онцгой хүүхэд” гэж хариулж л дээ.
Тэр бага байхдаа өргөмөл гэдэгтээ сэтгэл шаналдаг байсан. Өргөмөл гэдэг чинь эцэг эх нь түүнийг голсон гэсэн үг гэж боддог байж  л дээ. Тиймээс ч сэтгэлд нь нэг орон зай хоосрох шиг санагдаж, би энд байх ёстой хүн мөн үү гэх бодол толгойг нь ээрдэг байж. Тэр бүр коллежийнхоо найзуудад, “Apple”-ийг байгуулаад удаагүй байхдаа хамт олондоо “Надад нэг зүйл үгүйлэгдээд байх шиг санагддаг юм” гэж ярьдаг байсан юм билээ. Эцэст нь тэр төрсөн ээжийгээ хайхаар шийдсэн.
-Тэгээд ээжийгээ олсон гэж бичсэн байсан. 
-Нэлээн удаан хайсан боловч эрэл нь төдийлэн амжилт олоогүй тул тэр мөрдөгч хөлсөлсөн. Энэ үеэр төрсний гэрчилгээн дээр нь бичсэн эх баригч эмчийн нэр санаанд орж түүн рүү залгасан байгаа юм. Харин эмч түүнд “Миний баримтууд бүгд устсан. Тиймээс ээж тань чухам хэн болохыг би танд хэлж чадахгүй нь дээ” гэж хариулсан гэдэг. Гэхдээ тэр нь худал байж. Тэр оройдоо л “Намайг нас барсны дараа Стив Жобст хүргээрэй” гэсэн хаягтай захидал бичсэн байна. Удалгүй эмч нас барж, захидал Стивд ирсэн байна. Захидлын дагуу Стив ээжтэйгээ уулзаж, охин дүүтэй болсноо ч мэдсэн.
-Харин аав нь хэрхэн хүлээж авсан бол? 
-Аавыгаа хайхаар эхлээд дүүтэйгээ уулзсан гэдэг. Дүү нь яг л Стив шиг уран бүтээлч байсан нь түүнийг багагүй баярлуулсан. Гэхдээ дүү нь аавтайгаа уулзахыг тийм ч их хүсэхгүй байсан гэсэн. Гэхдээ Сирид төрж, Уисконсиний их сургуулийг дүүргэж, Калифорни руу нүүсэн гэдгийг нь ч хэлжээ. Тэднийг хайсаар очиход аав нь Сакраментод кофены газар ажиллуулж байж. Монаг аавтайгаа уулзуулахаар явуулахдаа Стив өөрийнхөө тухай битгий хэлээрэй гэж захисан байна. Тэр өөрийг нь бас ээжийг нь орхиод явсан хүнтэй уулзахыг хүсээгүй.
-Гэхдээ тэр өөрөө ч найз охиноо хөл хүнд болсных нь дараа орхиод явсан биз дээ. 
-Тэр үед тэр 23 настай байсан юм. Аав ч бас 23 настай байхдаа тэднийг орхисон байдаг.
-Аавынхаа хийсэн үйлдлийг давтсан байх нь. 
-Тийм ээ. Би энэ тухай түүнээс асуухад “Тэр үед сонин юм. Ингэж давхцах гэж байдаг аа гэж бодогож билээ” гэж хариулсан. Гэхдээ ааваасаа ялгаатай нь тэр охиныхоо өмнө хариуцлага хүлээж чадсан.
-10 жилийн дараа биз дээ? 
-Эцэг тогтоох шинжилгээний хариу гарсны дараа. Хэдийгээр Стив түүнтэй тийм ч ойр дотно байж чадаагүй ч тэр 10 жилийн хугацаанд охин нь их сайн төлөвшсөн байсан. Ахлах сургуульд байхдаа тэр аавтайгаа хамт амьдарч байсан.